LRT жүйесі елорданың климатына шыдай ма? Көлгінов жауап берді
274
Нұр-Сұлтан қаласының әкімі LRT жүйесі қаншалықты қауіпсіз деген сұраққа жауап берді, деп хабарлайды Stan.kz
“Қоғамның LRT-нің қауіпсіздігіне алаңдауы орынды. LRT бағандары – сараптамадан өткен күрделі инженериялық құрылыс. Жобаны жасауға сарапшылар, құрылысшылар, инженерлер атсалысты. Сондықтан біз барлық жайттарды, атап айтсақ, қысым, салмақ, ауа райына байланысты өзгерістерді ескердік. Мысал ретінде Нұр-Сұлтанның климатына ұқсас белдеуде орналасқан Канада мемлекетін алайық. Ол жақта да LRT жүйесі бар. Біздің мамандар бұл мемлекетке барып арнайы көріп келді. Жоба келісімшартымыз бар серіктестерімізге де осы сұрақты қойдық. Сол себепті біз негізгі міндет ретінде нысанның сапалы түрде салынуын алға қойып отырмыз. Өйткені күрделі LRT инженерлік-транспорттық жүйе”, – деді елорда әкімі.
Оның сөзінше, қазіргі басты міндет – LRT құрылысын аяқтау.
“Қазір қалада тұрған бетон бағандар сапалы, олардың әрқайсысының салмағы 220 тонадан асады. Олар арматура мен темір-бетоннан жасалған. Бетон маркасының сапасы өте жоғары. Бұдан бөлек мамандар бірнеше кезеңнен тұратын тексеру жүргізеді. Қазіргі басты мақсатымыз – LRT құрылысын аяқтау”, – дейді Көлгінов.
Еске салсақ, бұған дейін Нұр-Сұлтан әкімі Алтай Көлгінов LRT құрылысын аяқтау үшін тағы 577 миллион доллар керегін айтқан еді.
