БИЫЛ ӨҢІРДЕ 249 ӨРТ ОҚИҒАСЫ ТІРКЕЛДІ
199
Соңғы кездері облыста өрт оқиғасы жиілеп кетті,- деп хабарлайды Opennews.kz ақпарат агенттігі.
Мәселен, биыл өңірде 249 өрт оқиғасы орын алып, өткен жылмен салыстырғанда 7,6 пайызға көбейген. Салаға жауаптылардың айтуынша, қауіпсіздік ережелерін сақтамаудың кесірінен қайғылы оқиғалар жиі тіркелетінін алға тартады.
-Жыл басынан бері өрт оқиғасынан 2 адам қаза тауып, 3 адам түрлі дене жарақаттарын алды. Жыл сайын төтенше жағдайлар департаментінің қызметкерлері жылу беру маусымы қарсаныңда қауіпсіздік ережелерін сақтау және өртті болдырмау туралы тұрғындарға түсіндірме жүргізеді. Дегенмен, өткен жылу беру маусымында облыстағы тұрғын үйлерден 162 өрт шықты. Көбінесе мұндай оқиғалар тұрмыстық пештердің талапқа сай келмеуінен және балаларды қараусыз қалдырудан пайда болады. Қазіргі таңда әлеуметтік жағдайы осал санатындағы отбасылардың үйлеріне датчиктер орнатылуда, - деді облыстық ТЖД мемлекеттік өрт бақылау басқармасының басшысы Асхат Оразбаев.
Айта кетсек, облыс әкімінің орынбасары Мархабат Жайымбетовтың төрағалығымен Төтенше жағдайлардың алдын алу және оларды жою жөніндегі облыстық комиссияның кезектен тыс отырысы өткізілді. Комиссия отырысында алдағы жылыту маусымы кезеңіндегі өрт қауіпсіздігі туралы мәселе қозғалды. Аталған проблеманы тұрмыстық баллондар мен газбен жабдықтау жүйесінің объектілерін қауіпсіз пайдалануын сақтау жөнінде шаралар қабылдау тапсырылды.
