Шегірткемен күресу үшін мемлекет 3,8 млрд теңге бөлді

Ауыл шаруашылығы министрлігі шегіртке зиянкестерімен күресу үшін бюджеттен 3,8 млрд теңге бөлінгенін мәлімдеді, - деп хабарлайды "Opennews.kz" ақпарат агенттігі.

Мамандардың болжамынша, шегіртке 1,6 млн га аумаққа таралуы мүмкін. Бүгінгі таңда 385,3 мың га алаңда пестицидтердің қажетті қоры бар.

Аумақтарды өңдеуге мамандандырылған техника, оның ішінде жер үсті және әуе көлігі жұмылдырылады.

Қазірдің өзінде Түркістан облысында мароккалық шегіртке дернәсілдерінің пайда болғаны анықталды. Аймаққа пестицидтер толығымен жеткізілді. 8-9 сәуірде өңдеу іс-шараларын бастау жоспарланып отыр.

Басқа аймақтарда жерді химиялық өңдеу жұмыстары шегірткелердің таралу ошақтары анықталған кезде басталады.

Одан бөлек, көршілес мемлекеттермен шекаралас аумақтарда бірлескен зерттеу жұмыстары жүргізіледі. Бұл туралы Қазақстанның АШМ мамандары Ресей, Қытай және Өзбекстан мемлекеттеріндегі әріптестерімен алдын ала келісті.